ਸੈਲਫੋਸ ਜ਼ਹਿਰਖੋਰੀ: PGI ਪੀਜੀਆਈ ਦੇ ਡਾਕਟਰਾਂ ਵੱਲੋਂ ਜਾਨ ਬਚਾਉਣ ਵਾਲੀ ਨਵੀਂ ਥੈਰਪੀ ਦੀ ਖੋਜ
Chandigarh ਫਰਵਰੀ 2 (DPB)
Chandigarh ਚੰਡੀਗੜ੍ਹ ਸਥਿਤ ਪੋਸਟਗ੍ਰੈਜੂਏਟ ਇੰਸਟੀਚਿਊਟ ਆਫ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (PGIMER) ਦੇ ਡਾਕਟਰਾਂ ਨੇ ਐਲੂਮਿਨੀਅਮ ਫਾਸਫਾਈਡ, ਜਿਸਨੂੰ ਆਮ ਤੌਰ ’ਤੇ “ਸੈਲਫੋਸ” ਕਿਹਾ ਜਾਂਦਾ ਹੈ, ਨਾਲ ਹੋਣ ਵਾਲੀ ਜ਼ਹਿਰਖੋਰੀ ਦੇ ਇਲਾਜ ਵਿੱਚ ਇੱਕ ਵੱਡੀ ਕਾਮਯਾਬੀ ਹਾਸਲ ਕੀਤੀ ਹੈ। ਇਹ ਉੱਤਰੀ ਭਾਰਤ ਵਿੱਚ ਸਭ ਤੋਂ ਘਾਤਕ ਜ਼ਹਿਰਖੋਰੀਆਂ ਵਿੱਚੋਂ ਇੱਕ ਮੰਨੀ ਜਾਂਦੀ ਹੈ।
PGI ਪੀਜੀਆਈ ਦੇ ਇੰਟਰਨਲ ਮੈਡੀਸਨ ਵਿਭਾਗ ਵੱਲੋਂ ਕੀਤੀ ਗਈ ਇਹ ਪਹਿਲੀ ਕਲੀਨਿਕਲ ਸਟਡੀ ਹੈ, ਜਿਸ ਵਿੱਚ “ਇੰਟਰਾਵੀਨਸ ਲਿਪਿਡ ਇਮਲਸ਼ਨ” ਨੂੰ ਇੱਕ ਨਵੀਂ ਜਾਨ ਬਚਾਉਣ ਵਾਲੀ ਥੈਰਪੀ ਵਜੋਂ ਪ੍ਰਭਾਵਸ਼ਾਲੀ ਸਾਬਤ ਕੀਤਾ ਗਿਆ ਹੈ। ਅਧਿਐਨ ਦੇ ਮਹੱਤਵਪੂਰਨ ਨਤੀਜੇ ਅੰਤਰਰਾਸ਼ਟਰੀ ਜਰਨਲ European Review of Medical and Pharmacological Sciences ਵਿੱਚ ਪ੍ਰਕਾਸ਼ਿਤ ਹੋਏ ਹਨ।
ਅਧਿਐਨ ਡੀਨ (ਅਕੈਡਮਿਕਸ) ਅਤੇ ਵਿਭਾਗ ਮੁਖੀ ਡਾ. ਸੰਜੇ ਜੈਨ ਦੀ ਰਹਿਨੁਮਾਈ ਹੇਠ ਕੀਤਾ ਗਿਆ। ਅਧਿਐਨ ਦੇ ਮੁੱਖ ਲੇਖਕ ਡਾ. ਮੰਡੀਪ ਸਿੰਘ ਭਾਟੀਆ ਨੇ ਦੱਸਿਆ ਕਿ “ਸਟੈਂਡਰਡ ਇਲਾਜ ਨਾਲ ਨਾਲ ਲਿਪਿਡ ਇਮਲਸ਼ਨ ਦੇਣ ਨਾਲ ਮੌਤ ਦਰ ਵਿੱਚ ਸਪੱਸ਼ਟ ਕਮੀ ਆਈ, ਮੈਟਾਬੋਲਿਕ ਐਸਿਡੋਸਿਸ ਤੇਜ਼ੀ ਨਾਲ ਠੀਕ ਹੋਈ ਅਤੇ ਸ਼ਾਕ ਤੇ ਦਿਲੀ ਸਮੱਸਿਆਵਾਂ ਵਿੱਚ ਸੁਧਾਰ ਦੇਖਿਆ ਗਿਆ।”
ਇਹ ਥੈਰਪੀ ਸਸਤੀ, ਆਸਾਨੀ ਨਾਲ ਉਪਲਬਧ ਅਤੇ ਜ਼ਿਲ੍ਹਾ ਹਸਪਤਾਲਾਂ ਤੱਕ ਵਿੱਚ ਮੌਜੂਦ ਹੋਣ ਕਰਕੇ ਪਿੰਡਾਂ ਅਤੇ ਦੂਰ-ਦਰਾਜ਼ ਇਲਾਕਿਆਂ ਵਿੱਚ ਵੀ ਜਾਨਾਂ ਬਚਾਉਣ ਦੀ ਸਮਰਥਾ ਰੱਖਦੀ ਹੈ, ਜਿੱਥੇ ਸੈਲਫੋਸ ਜ਼ਹਿਰਖੋਰੀ ਦੇ ਮਾਮਲੇ ਸਭ ਤੋਂ ਵੱਧ ਹਨ।
