Follow us

17/11/2026 5:23 AM

Search
Close this search box.
Home » News In Punjabi » ਚੰਡੀਗੜ੍ਹ » ਚੰਡੀਗੜ੍ਹ ਵਿੱਚ ਲੱਗਣਗੇ 3.50 ਲੱਖ ਪੌਦੇ, ਡੱਡੂਮਾਜਰਾ ਦਾ ਡੰਪਿੰਗ ਗਰਾਊਂਡ ਬਣੇਗਾ ਔਸ਼ਧੀ ਬਾਗ਼

ਚੰਡੀਗੜ੍ਹ ਵਿੱਚ ਲੱਗਣਗੇ 3.50 ਲੱਖ ਪੌਦੇ, ਡੱਡੂਮਾਜਰਾ ਦਾ ਡੰਪਿੰਗ ਗਰਾਊਂਡ ਬਣੇਗਾ ਔਸ਼ਧੀ ਬਾਗ਼

ਸੰਤ ਸਮਾਜ ਨੇ ਮੁੜ ਵਿਕਸਿਤ ਡੰਪਿੰਗ ਗਰਾਊਂਡ ਨੂੰ ਲਿਆ ਗੋਦ; ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਨੇ ਸ਼ਹਿਰ ਨੂੰ ‘ਹਰਬਲ ਗਾਰਡਨ ਸਿਟੀ’ ਬਣਾਉਣ ਦੀ ਮੁਹਿੰਮ ਦਾ ਕੀਤਾ ਆਗਾਜ਼

Chandigarh Herbal Garden City: ਚੰਡੀਗੜ੍ਹ ਦੀ ਹਰਿਆਵਲ ਵਧਾਉਣ ਅਤੇ ਵਾਤਾਵਰਣ ਦੀ ਸੰਭਾਲ ਲਈ ਨਗਰ ਨਿਗਮ ਨੇ ਸੰਤ ਸਮਾਜ ਅਤੇ ਸਵਾਮੀ ਰਾਜੇਸ਼ਵਰਾਨੰਦ ਜੀ ਮਹਾਰਾਜ ਟਰੱਸਟ ਦੇ ਸਹਿਯੋਗ ਨਾਲ ਸ਼ਹਿਰ ਵਿੱਚ 3.50 ਲੱਖ ਪੌਦੇ ਲਗਾਉਣ ਦੀ ਮੁਹਿੰਮ ਸ਼ੁਰੂ ਕੀਤੀ ਹੈ। ਇਸ ਪਹਿਲਕਦਮੀ ਦਾ ਉਦੇਸ਼ ਚੰਡੀਗੜ੍ਹ ਨੂੰ ‘ਹਰਬਲ ਗਾਰਡਨ ਸਿਟੀ’ ਵਜੋਂ ਵਿਕਸਿਤ ਕਰਨਾ ਹੈ।

ਇਸ ਮੁਹਿੰਮ ਦਾ ਅਹਿਮ ਪਹਿਲੂ ਡੱਡੂਮਾਜਰਾ ਦੇ ਮੁੜ ਵਿਕਸਿਤ ਕੀਤੇ ਡੰਪਿੰਗ ਗਰਾਊਂਡ ਨੂੰ ਔਸ਼ਧੀ ਬਾਗ਼ ਵਿੱਚ ਤਬਦੀਲ ਕਰਨ ਦੀ ਯੋਜਨਾ ਹੈ। ਆਚਾਰੀਆ ਸਵਾਮੀ ਰਾਜੇਸ਼ਵਰਾਨੰਦ ਜੀ ਮਹਾਰਾਜ ਦੀ ਅਗਵਾਈ ਹੇਠ ਸੰਤ ਸਮਾਜ ਨੇ ਇਸ ਸਥਾਨ ਨੂੰ ਗੋਦ ਲੈਣ ਦਾ ਐਲਾਨ ਕੀਤਾ ਹੈ। ਇੱਥੇ ਔਸ਼ਧੀ ਪੌਦੇ, ਦੇਸੀ ਰੁੱਖ ਅਤੇ ਹੋਰ ਹਰਿਆਲੀ ਵਿਕਸਿਤ ਕੀਤੀ ਜਾਵੇਗੀ, ਤਾਂ ਜੋ ਕਦੇ ਕੂੜੇ ਦੇ ਢੇਰ ਵਜੋਂ ਜਾਣਿਆ ਜਾਂਦਾ ਇਹ ਸਥਾਨ ਭਵਿੱਖ ਵਿੱਚ ਕੁਦਰਤੀ ਸੁੰਦਰਤਾ ਅਤੇ ਔਸ਼ਧੀ ਵਨਸਪਤੀ ਦਾ ਕੇਂਦਰ ਬਣ ਸਕੇ।

ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਨੇ ਸ਼ਹਿਰ ਨੂੰ ‘ਹਰਬਲ ਗਾਰਡਨ ਸਿਟੀ’ ਬਣਾਉਣ ਦੀ ਮੁਹਿੰਮ ਦਾ ਕੀਤਾ ਆਗਾਜ਼

ਪੰਜਾਬ ਦੇ ਰਾਜਪਾਲ ਅਤੇ ਯੂਟੀ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬ ਚੰਦ ਕਟਾਰੀਆ ਨੇ ਇਸ ਵਿਸ਼ਾਲ ਪੌਦੇ ਲਗਾਉਣ ਦੀ ਮੁਹਿੰਮ ਦਾ ਆਗਾਜ਼ ਕਰਦਿਆਂ ਨਗਰ ਨਿਗਮ ਅਤੇ ਸੰਤ ਸਮਾਜ ਦੇ ਸਾਂਝੇ ਉਪਰਾਲੇ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਵਾਤਾਵਰਣ ਦੀ ਸੁਰੱਖਿਆ ਸਿਰਫ਼ ਸਰਕਾਰ ਦੀ ਜ਼ਿੰਮੇਵਾਰੀ ਨਹੀਂ, ਸਗੋਂ ਸਮਾਜ ਦੇ ਹਰ ਵਰਗ ਦਾ ਸਾਂਝਾ ਫ਼ਰਜ਼ ਹੈ।

ਉਨ੍ਹਾਂ ਆਯੁਰਵੇਦ ਅਤੇ ਔਸ਼ਧੀ ਪੌਦਿਆਂ ਦੀ ਮਹੱਤਤਾ ਬਾਰੇ ਗੱਲ ਕਰਦਿਆਂ ਲੋਕਾਂ ਨੂੰ ਕੁਦਰਤ ਦੀ ਸੰਭਾਲ ਲਈ ਅੱਗੇ ਆਉਣ ਦਾ ਸੱਦਾ ਦਿੱਤਾ। ਕਟਾਰੀਆ ਨੇ ਪੰਜਾਬ ਅਤੇ ਚੰਡੀਗੜ੍ਹ ਨੂੰ ਨਸ਼ਾ-ਮੁਕਤ ਬਣਾਉਣ ਦੀ ਲੋੜ ‘ਤੇ ਜ਼ੋਰ ਦਿੰਦਿਆਂ ਨੌਜਵਾਨਾਂ ਨੂੰ ਉਸਾਰੂ ਅਤੇ ਸਮਾਜ ਭਲਾਈ ਦੇ ਕੰਮਾਂ ਨਾਲ ਜੋੜਨ ਦੀ ਅਪੀਲ ਵੀ ਕੀਤੀ।

ਆਚਾਰੀਆ ਸਵਾਮੀ ਰਾਜੇਸ਼ਵਰਾਨੰਦ ਜੀ ਮਹਾਰਾਜ ਨੇ ਕਿਹਾ ਕਿ ਭਾਰਤ ਦੀ ਪ੍ਰਾਚੀਨ ਆਯੁਰਵੈਦਿਕ ਪਰੰਪਰਾ ਵਿੱਚ ਔਸ਼ਧੀ ਪੌਦਿਆਂ ਦਾ ਵਿਸ਼ੇਸ਼ ਮਹੱਤਵ ਹੈ। ਉਨ੍ਹਾਂ ਚੰਡੀਗੜ੍ਹ ਨੂੰ ਹਰਬਲ ਗਾਰਡਨ ਸਿਟੀ ਬਣਾਉਣ ਲਈ ਸੰਤ ਸਮਾਜ ਵੱਲੋਂ ਹਰ ਸੰਭਵ ਸਹਿਯੋਗ ਦੇਣ ਦਾ ਭਰੋਸਾ ਦਿੱਤਾ।

ਮੇਅਰ ਸੌਰਭ ਜੋਸ਼ੀ ਨੇ ਸਵਾਮੀ ਜੀ ਮਹਾਰਾਜ ਅਤੇ ਸੰਤ ਸਮਾਜ ਦਾ ਇਸ ਮੁਹਿੰਮ ਵਿੱਚ ਸਹਿਯੋਗ ਦੇਣ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ, “ਸਾਡਾ ਉਦੇਸ਼ ਸਿਰਫ਼ 3.50 ਲੱਖ ਪੌਦੇ ਲਗਾਉਣਾ ਨਹੀਂ, ਸਗੋਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਹਰਿਆ-ਭਰਿਆ ਵਿਰਸਾ ਸਿਰਜਣਾ ਹੈ। ਅਸੀਂ ਕੂੜੇ ਅਤੇ ਵਾਤਾਵਰਣ ਦੀਆਂ ਸਮੱਸਿਆਵਾਂ ਵਾਲੀਆਂ ਥਾਵਾਂ ਨੂੰ ਹਰਿਆਲੀ ਦੀ ਦੌਲਤ ਵਿੱਚ ਬਦਲਣਾ ਚਾਹੁੰਦੇ ਹਾਂ। ਡੱਡੂਮਾਜਰਾ ਦੇ ਡੰਪਿੰਗ ਗਰਾਊਂਡ ਨੂੰ ਔਸ਼ਧੀ ਬਾਗ਼ ਵਜੋਂ ਵਿਕਸਿਤ ਕਰਨਾ ਇਸ ਦਿਸ਼ਾ ਵਿੱਚ ਅਹਿਮ ਕਦਮ ਹੋਵੇਗਾ।”

ਮੇਅਰ ਨੇ ਕਿਹਾ ਕਿ ਨਗਰ ਨਿਗਮ ਵੱਲੋਂ ਇਸ ਮੁਹਿੰਮ ਅਤੇ ਔਸ਼ਧੀ ਬਗੀਚਿਆਂ ਦੇ ਵਿਕਾਸ ਲਈ ਪੂਰਾ ਸਹਿਯੋਗ ਦਿੱਤਾ ਜਾਵੇਗਾ।

ਸਮਾਗਮ ਦੌਰਾਨ ਪ੍ਰਸ਼ਾਸਕ, ਮੇਅਰ ਅਤੇ ਸੰਤ ਸਮਾਜ ਦੀਆਂ ਪ੍ਰਮੁੱਖ ਸ਼ਖ਼ਸੀਅਤਾਂ ਨੇ ਪੌਦਿਆਂ ਨਾਲ ਭਰੇ ਵਾਹਨਾਂ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਇਸ ਤੋਂ ਬਾਅਦ ਸੈਕਟਰ 24-ਸੀ ਦੀ ਗ੍ਰੀਨ ਬੈਲਟ ਵਿੱਚ ਔਸ਼ਧੀ ਪੌਦੇ ਲਗਾ ਕੇ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਗਈ। ਡੱਡੂਮਾਜਰਾ ਦੇ ਮੁੜ ਵਿਕਸਿਤ ਡੰਪਿੰਗ ਗਰਾਊਂਡ ਵਿੱਚ ਵੀ ਪੌਦੇ ਲਗਾਏ ਗਏ।

ਮੁਹਿੰਮ ਤਹਿਤ ਰਾਮਲੀਲਾ ਗਰਾਊਂਡ, ਸੈਕਟਰ 24, ਬਾਂਸ ਵੈਲੀ ਸੈਕਟਰ 23, ਲੀਜ਼ਰ ਵੈਲੀ, ਸ਼ਾਂਤੀ ਕੁੰਜ, ਰਾਜਿੰਦਰਾ ਗਾਰਡਨ, ਜਾਪਾਨੀ ਗਾਰਡਨ ਅਤੇ ਮਨੀਮਾਜਰਾ ਦੇ ਸ਼ਿਵਾਲਿਕ ਗਾਰਡਨ ਸਮੇਤ ਸ਼ਹਿਰ ਦੇ ਕਈ ਹਰੇ-ਭਰੇ ਸਥਾਨਾਂ ‘ਤੇ ਪੌਦੇ ਲਗਾਏ ਜਾਣਗੇ। ਇਸ ਦੌਰਾਨ ਨਿੰਮ, ਆਂਵਲਾ, ਬਾਂਸ, ਔਸ਼ਧੀ ਬੂਟੇ ਅਤੇ ਦੇਸੀ ਕਿਸਮਾਂ ਦੇ ਰੁੱਖ ਲਗਾਏ ਜਾਣਗੇ।

ਸਮਾਗਮ ਵਿੱਚ ਪੰਜਾਬ, ਹਰਿਆਣਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਤੋਂ ਸੈਂਕੜੇ ਸੰਤਾਂ-ਮਹਾਂਪੁਰਸ਼ਾਂ ਨੇ ਸ਼ਿਰਕਤ ਕੀਤੀ। ਇਨ੍ਹਾਂ ਵਿੱਚ ਨਿਰਮਲ ਅਖਾੜੇ ਦੇ ਆਚਾਰੀਆ ਸਵਾਮੀ ਰਾਜੇਸ਼ਵਰਾਨੰਦ ਜੀ ਮਹਾਰਾਜ, ਸੰਤ ਬਾਬਾ ਗੁਰਪ੍ਰੀਤ ਸਿੰਘ (ਬਰਨ ਵਾਲੇ), ਸੰਤ ਬਾਬਾ ਲੱਖਾ ਸਿੰਘ (ਨਾਨਕਸਰ), ਸੰਤ ਬਾਬਾ ਜੋਗਾ ਸਿੰਘ (ਨਾਮਧਾਰੀ), ਸੰਤ ਬਾਬਾ ਸ਼ੇਰ ਸਿੰਘ (ਬੁੱਢਾ ਦਲ), ਬਾਬਾ ਪਰਮਜੀਤ ਸਿੰਘ, ਸੰਤ ਬਾਬਾ ਸੁਖਪਾਲ ਸਿੰਘ, ਸੰਤ ਬਾਬਾ ਸੁਖਦੇਵ ਸਿੰਘ, ਸੰਤ ਬਾਬਾ ਸਤਪਾਲ ਸਿੰਘ, ਸੰਤ ਬਾਬਾ ਹਕਮ ਸਿੰਘ, ਸੰਤ ਬਾਬਾ ਰਣਪ੍ਰੀਤ ਸਿੰਘ, ਸੰਤ ਬਾਬਾ ਹਰਮਨ ਸਿੰਘ, ਸਾਈਂ ਨਾਥ ਜੀ, ਮਹੰਤ ਜਸਵੀਰ ਦਾਸ ਅਤੇ ਸਵਾਮੀ ਕੇਸ਼ਵਾਨੰਦ ਸਮੇਤ ਹੋਰ ਧਾਰਮਿਕ ਸ਼ਖ਼ਸੀਅਤਾਂ ਮੌਜੂਦ ਸਨ।

ਇਸ ਮੌਕੇ ਨਗਰ ਨਿਗਮ ਕਮਿਸ਼ਨਰ ਅਮਿਤ ਕੁਮਾਰ, ਮੁੱਖ ਇੰਜੀਨੀਅਰ ਸੰਜੇ ਅਰੋੜਾ, ਨਗਰ ਨਿਗਮ ਦੇ ਸੀਨੀਅਰ ਅਧਿਕਾਰੀ ਅਤੇ ਵੱਖ-ਵੱਖ ਸਮਾਜਿਕ ਤੇ ਧਾਰਮਿਕ ਸੰਸਥਾਵਾਂ ਦੇ ਨੁਮਾਇੰਦੇ ਵੀ ਹਾਜ਼ਰ ਸਨ।


dawnpunjab
Author: dawnpunjab

Leave a Comment

RELATED LATEST NEWS

Top Headlines

Live Cricket

Rashifal