ਕਮਿਊਨਿਟੀ ਕੁੱਤਿਆਂ ਦੀ ਕੁੱਟਮਾਰ ਰੋਕਣ ਗਏ ਕਾਰਕੁਨਾਂ ’ਤੇ ਹਮਲੇ ਦਾ ਦੋਸ਼; ਇੱਕ ਨਾਬਾਲਗ ਸਮੇਤ ਦੋ ਭਰਾਵਾਂ ਨਾਲ ਵੀ ਕੀਤੀ ਗਈ ਕਥਿਤ ਕੁੱਟਮਾਰ
Mohali: ਜ਼ੀਰਕਪੁਰ ਦੀ ਇੱਕ ਹਾਊਸਿੰਗ ਸੁਸਾਇਟੀ ਵਿੱਚ ਕਮਿਊਨਿਟੀ ਕੁੱਤਿਆਂ ਦੀ ਕੁੱਟਮਾਰ ਰੋਕਣ ਲਈ ਪਹੁੰਚੇ ਪਸ਼ੂ ਭਲਾਈ ਕਾਰਕੁਨਾਂ ’ਤੇ ਹਮਲਾ ਕਰਨ ਦੇ ਦੋਸ਼ ਹੇਠ ਪੁਲੀਸ ਨੇ ਚਾਰ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਹਮਲੇ ਵਿੱਚ ਇੱਕ ਨਾਬਾਲਗ ਸਮੇਤ ਕੁਝ ਕਾਰਕੁਨਾਂ ਦੇ ਜ਼ਖ਼ਮੀ ਹੋਣ ਦੀ ਵੀ ਸੂਚਨਾ ਹੈ।
ਜ਼ੀਰਕਪੁਰ ਥਾਣੇ ਵਿੱਚ ਇਹ ਮਾਮਲਾ 9 ਨਵੰਬਰ ਨੂੰ ਪੀਪਲ ਫਾਰ ਐਨੀਮਲਜ਼ (ਪੀਐੱਫਏ), ਜ਼ੀਰਕਪੁਰ ਦੇ ਮੈਂਬਰ ਨਿਸ਼ਾਦ ਸੈਲੀ ਦੀ ਸ਼ਿਕਾਇਤ ’ਤੇ ਦਰਜ ਕੀਤਾ ਗਿਆ। ਮੁਲਜ਼ਮਾਂ ਦੀ ਪਛਾਣ ਜਸਵੰਤ ਸਿੰਘ, ਤਰਨ, ਰਾਣਾ ਠਾਕੁਰ ਅਤੇ ਅੰਗਰੇਜ ਸਿੰਘ ਵਜੋਂ ਹੋਈ ਹੈ। ਮਾਮਲੇ ਵਿੱਚ ਕੁਝ ਹੋਰ ਵਿਅਕਤੀਆਂ ਨੂੰ ਵੀ ਨਾਮਜ਼ਦ ਕੀਤਾ ਗਿਆ ਹੈ।
ਸ਼ਿਕਾਇਤ ਅਨੁਸਾਰ, 4 ਨਵੰਬਰ ਨੂੰ ਰਾਤ ਕਰੀਬ 10 ਵਜੇ ਸੈਲੀ ਨੂੰ ਭਬਾਤ ਸਥਿਤ ਏਕੇਐੱਸ-2 ਸੁਸਾਇਟੀ ਵਿੱਚ ਰਹਿੰਦੇ ਇੱਕ ਵਲੰਟੀਅਰ ਨੇ ਫੋਨ ਕਰਕੇ ਦੱਸਿਆ ਕਿ ਉੱਥੇ ਕੁਝ ਲੋਕ ਆਵਾਰਾ ਕੁੱਤਿਆਂ ਦੀ ਕੁੱਟਮਾਰ ਕਰ ਰਹੇ ਹਨ। ਇਸ ’ਤੇ ਸੈਲੀ ਰਾਤ ਕਰੀਬ 10.40 ਵਜੇ ਹੋਰ ਵਲੰਟੀਅਰਾਂ ਅਤੇ ਇੱਕ ਸਥਾਨਕ ਪਸ਼ੂ ਸੇਵਕ ਨਾਲ ਸੁਸਾਇਟੀ ਪਹੁੰਚਿਆ ਤਾਂ ਜੋ ਜ਼ਖ਼ਮੀ ਕੁੱਤਿਆਂ ਨੂੰ ਡਾਕਟਰੀ ਸਹਾਇਤਾ ਦਿੱਤੀ ਜਾ ਸਕੇ।
ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਜਦੋਂ ਸੈਲੀ ਨੇ ਇਕੱਠੇ ਹੋਏ ਲੋਕਾਂ ਨੂੰ ਦੱਸਿਆ ਕਿ ਉਹ ਸਿਰਫ਼ ਜ਼ਖ਼ਮੀ ਕੁੱਤਿਆਂ ਦਾ ਇਲਾਜ ਕਰਨ ਆਏ ਹਨ ਤਾਂ ਕੁਝ ਵਸਨੀਕ ਭੜਕ ਗਏ। ਉਨ੍ਹਾਂ ਨੇ ਸੈਲੀ ਨੂੰ ਥੱਪੜ ਮਾਰੇ, ਗਰਦਨ ਤੋਂ ਫੜਿਆ ਅਤੇ ਧੱਕੇ ਮਾਰੇ। ਜਦੋਂ ਵਲੰਟੀਅਰਾਂ ਨੇ ਸੁਰੱਖਿਆ ਅਤੇ ਸਬੂਤ ਵਜੋਂ ਘਟਨਾ ਦੀ ਵੀਡੀਓ ਬਣਾਉਣ ਲਈ ਮੋਬਾਈਲ ਫੋਨ ਕੱਢੇ ਤਾਂ ਉਨ੍ਹਾਂ ਦੇ ਫੋਨ ਖੋਹਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ।
ਸੁਸਾਇਟੀ ਵਿੱਚ ਰਹਿੰਦੇ ਦੋ ਭਰਾਵਾਂ ਅਰਨਵ ਸਿੰਘ (17) ਅਤੇ ਯੁਵੀ ਸਿੰਘ (19) ਨਾਲ ਵੀ ਕਥਿਤ ਤੌਰ ’ਤੇ ਕੁੱਟਮਾਰ ਕੀਤੀ ਗਈ। ਦੋਵੇਂ ਭਰਾ ਘਟਨਾ ਦੀ ਵੀਡੀਓ ਬਣਾ ਰਹੇ ਸਨ। ਜ਼ਖ਼ਮੀ ਵਲੰਟੀਅਰਾਂ ਦਾ ਇਲਾਜ ਸੀਐੱਚਸੀ ਢਕੌਲੀ ਅਤੇ ਸਰਕਾਰੀ ਮੈਡੀਕਲ ਕਾਲਜ ਅਤੇ ਹਸਪਤਾਲ, ਸੈਕਟਰ 32, ਚੰਡੀਗੜ੍ਹ ਵਿੱਚ ਕਰਵਾਇਆ ਗਿਆ।
ਪੁਲੀਸ ਨੇ ਸ਼ਿਕਾਇਤ ਅਤੇ ਮੈਡੀਕਲ-ਲੀਗਲ ਰਿਪੋਰਟਾਂ (ਐੱਮਐੱਲਆਰ) ਦੇ ਆਧਾਰ ’ਤੇ ਐੱਫਆਈਆਰ ਨੰਬਰ 0636 ਦਰਜ ਕੀਤੀ ਹੈ। ਇਸ ਵਿੱਚ ਭਾਰਤੀ ਨਿਆਂ ਸੰਹਿਤਾ (ਬੀਐੱਨਐੱਸ), 2023 ਦੀਆਂ ਧਾਰਾਵਾਂ 115(2), 74 ਅਤੇ 3(5) ਲਾਈਆਂ ਗਈਆਂ ਹਨ।
ਪੀਐੱਫਏ ਦੇ ਉੱਤਰੀ ਜ਼ੋਨ ਦੇ ਮੁਖੀ ਸਾਰਥਕ ਜੈਨ ਨੇ ਕਿਹਾ ਕਿ ਇਹ ਮਾਮਲਾ ਸਿਰਫ਼ ਇੱਕ ਘਟਨਾ ਤੱਕ ਸੀਮਤ ਨਹੀਂ, ਸਗੋਂ ਸਿਧਾਂਤਾਂ ਨਾਲ ਜੁੜਿਆ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਜਾਨਵਰਾਂ ਨਾਲ ਬੇਰਹਿਮੀ ਕਰਨਾ ਅਪਰਾਧ ਹੈ ਅਤੇ ਉਨ੍ਹਾਂ ਦੀ ਰੱਖਿਆ ਕਰਨ ਵਾਲਿਆਂ ਨਾਲ ਹਿੰਸਾ ਕਰਨਾ ਵੀ ਕਾਨੂੰਨੀ ਕਾਰਵਾਈ ਦੇ ਘੇਰੇ ਵਿੱਚ ਆਉਂਦਾ ਹੈ।
ਉਨ੍ਹਾਂ ਕਿਹਾ ਕਿ ਕਮਿਊਨਿਟੀ ਜਾਨਵਰਾਂ ਸਬੰਧੀ ਇਤਰਾਜ਼ ਹੋਣ ’ਤੇ ਵਸਨੀਕਾਂ ਅਤੇ ਵੈਲਫੇਅਰ ਐਸੋਸੀਏਸ਼ਨਾਂ ਨੂੰ ਪੁਲੀਸ, ਨਗਰ ਨਿਗਮ ਜਾਂ ਪਸ਼ੂ ਭਲਾਈ ਬੋਰਡ ਕੋਲ ਜਾਣਾ ਚਾਹੀਦਾ ਹੈ। ਕਿਸੇ ਵੀ ਤਰ੍ਹਾਂ ਦਾ ਮਤਭੇਦ ਕਿਸੇ ਨੂੰ ਕਾਨੂੰਨ ਆਪਣੇ ਹੱਥ ਵਿੱਚ ਲੈਣ ਦਾ ਅਧਿਕਾਰ ਨਹੀਂ ਦਿੰਦਾ।
ਪੀਐੱਫਏ ਨੇ ਜ਼ੀਰਕਪੁਰ ਦੇ ਐੱਸਐੱਚਓ ਇੰਸਪੈਕਟਰ ਜੀਵਨ ਸਿੰਘ ਅਤੇ ਡੀਐੱਸਪੀ ਗ਼ਜ਼ਲਪ੍ਰੀਤ ਕੌਰ ਦੀ ਕਾਰਵਾਈ ਦੀ ਸ਼ਲਾਘਾ ਕਰਦਿਆਂ ਜਾਂਚ ਜਲਦੀ ਮੁਕੰਮਲ ਕਰਨ ਦੀ ਮੰਗ ਕੀਤੀ ਹੈ। ਜਾਂਚ ਅਧਿਕਾਰੀ ਏਐੱਸਆਈ ਲਾਭ ਸਿੰਘ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ।
