ਪ੍ਰਸਿੱਧ ਕਲਾਕਾਰ ਵੀਰੇਨ ਤੰਵਰ ਨੂੰ ‘ਕਲਾ ਰਤਨ ਐਵਾਰਡ 2026’ ਨਾਲ ਕੀਤਾ ਸਨਮਾਨਿਤ; ਪੰਜਾਬ ਅਤੇ ਟ੍ਰਾਈਸਿਟੀ ਦੇ ਛੇ ਉੱਘੇ ਕਲਾਕਾਰਾਂ ਦੀਆਂ ਰਚਨਾਵਾਂ ਵੀ ਖਿੱਚ ਦਾ ਕੇਂਦਰ ਬਣੀਆਂ
Art Connect 2026 Chandigarh University: ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਫਾਈਨ ਆਰਟਸ ਵਿਭਾਗ ਵੱਲੋਂ ਚੰਡੀਗੜ੍ਹ ਲਲਿਤ ਕਲਾ ਅਕਾਦਮੀ ਅਤੇ ਪੰਜਾਬ ਲਲਿਤ ਕਲਾ ਅਕਾਦਮੀ ਦੇ ਸਹਿਯੋਗ ਨਾਲ ਸਾਲਾਨਾ ਕਲਾ ਪ੍ਰਦਰਸ਼ਨੀ ‘ਆਰਟ ਕਨੈਕਟ 2026’ ਦਾ ਆਯੋਜਨ ਪੰਜਾਬ ਕਲਾ ਭਵਨ, ਚੰਡੀਗੜ੍ਹ ਵਿਖੇ ਕੀਤਾ ਗਿਆ। 19 ਤੋਂ 22 ਨਵੰਬਰ ਤੱਕ ਚੱਲਣ ਵਾਲੀ ਇਸ ਪ੍ਰਦਰਸ਼ਨੀ ਵਿੱਚ ਵਿਦਿਆਰਥੀਆਂ ਅਤੇ ਪੰਜਾਬ ਤੇ ਟ੍ਰਾਈਸਿਟੀ ਦੇ ਛੇ ਨਾਮਵਰ ਕਲਾਕਾਰਾਂ ਦੀਆਂ 100 ਤੋਂ ਵੱਧ ਕਲਾਕ੍ਰਿਤਾਂ ਪ੍ਰਦਰਸ਼ਿਤ ਕੀਤੀਆਂ ਗਈਆਂ ਹਨ।
ਪ੍ਰਦਰਸ਼ਨੀ ਦਾ ਉਦਘਾਟਨ ਯੂਟੀ ਚੰਡੀਗੜ੍ਹ ਦੇ ਸੱਭਿਆਚਾਰ ਅਤੇ ਸੈਰ-ਸਪਾਟਾ ਵਿਭਾਗ ਦੇ ਸਕੱਤਰ ਡਾ. ਸਈਅਦ ਆਬਿਦ ਰਸ਼ੀਦ ਸ਼ਾਹ ਨੇ ਮੁੱਖ ਮਹਿਮਾਨ ਵਜੋਂ ਕੀਤਾ। ਇਸ ਮੌਕੇ ਪੰਜਾਬ ਕਲਾ ਪ੍ਰੀਸ਼ਦ ਦੇ ਚੇਅਰਮੈਨ ਸਵਰਨਜੀਤ ਸਿੰਘ ਸਵੀ, ਪੰਜਾਬ ਲਲਿਤ ਕਲਾ ਅਕਾਦਮੀ ਦੇ ਪ੍ਰਧਾਨ ਸੁਮੀਤ ਦੁਆ, ਚੰਡੀਗੜ੍ਹ ਲਲਿਤ ਕਲਾ ਅਕਾਦਮੀ ਦੇ ਪ੍ਰਧਾਨ ਭੀਮ ਮਲਹੋਤਰਾ, ਉਪ ਪ੍ਰਧਾਨ ਰਵਿੰਦਰ ਸ਼ਰਮਾ, ਬਾਲੀਵੁੱਡ ਅਦਾਕਾਰਾ ਟੀਨਾ ਆਹੂਜਾ ਅਤੇ ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਪ੍ਰੋ. (ਡਾ.) ਸਤਬੀਰ ਸਿੰਘ ਸਹਿਗਲ ਸਮੇਤ ਕਈ ਸ਼ਖ਼ਸੀਅਤਾਂ ਮੌਜੂਦ ਸਨ।

ਪ੍ਰਦਰਸ਼ਨੀ ਵਿੱਚ ਆਧੁਨਿਕ ਅਤੇ ਰਵਾਇਤੀ ਕਲਾ ਦੇ ਵੱਖ-ਵੱਖ ਰੂਪਾਂ ਨੂੰ ਪੇਸ਼ ਕੀਤਾ ਗਿਆ। ਇਨ੍ਹਾਂ ਵਿੱਚ ਆਇਲ ਪੇਂਟਿੰਗ, ਐਕ੍ਰੀਲਿਕ ਪੇਂਟਿੰਗ, ਪ੍ਰਿੰਟਮੇਕਿੰਗ, ਫੋਟੋਗ੍ਰਾਫੀ, ਮੂਰਤੀਕਲਾ, ਇੰਸਟਾਲੇਸ਼ਨ ਆਰਟ, ਪਾਮ ਲੀਫ ਕਾਰਵਿੰਗ ਅਤੇ ਲਾਈਵ ਆਰਟ ਪ੍ਰਦਰਸ਼ਨ ਸ਼ਾਮਲ ਹਨ। ਇਸ ਮੌਕੇ ‘ਆਰਟ ਕਨੈਕਟ 2026’ ਕੈਟਾਲਾਗ ਵੀ ਜਾਰੀ ਕੀਤਾ ਗਿਆ।
ਵੀਰੇਨ ਤੰਵਰ ਨੂੰ ‘ਕਲਾ ਰਤਨ ਐਵਾਰਡ 2026’
ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਫਾਈਨ ਆਰਟਸ ਵਿਭਾਗ ਵੱਲੋਂ ਪ੍ਰਸਿੱਧ ਸਮਕਾਲੀ ਕਲਾਕਾਰ ਅਤੇ ਆਲ ਇੰਡੀਆ ਫਾਈਨ ਆਰਟਸ ਐਂਡ ਕਰਾਫਟਸ ਸੋਸਾਇਟੀ (AIFACS) ਦੇ ਚੇਅਰਮੈਨ ਵੀਰੇਨ ਤੰਵਰ ਨੂੰ ‘ਕਲਾ ਰਤਨ ਐਵਾਰਡ 2026’ ਨਾਲ ਸਨਮਾਨਿਤ ਕੀਤਾ ਗਿਆ। ਪੰਜ ਦਹਾਕਿਆਂ ਤੋਂ ਵੱਧ ਦੇ ਕਲਾ ਸਫ਼ਰ ਦੌਰਾਨ ਉਨ੍ਹਾਂ ਦੀਆਂ ਰਚਨਾਵਾਂ ਯੂਰਪ, ਅਮਰੀਕਾ, ਏਸ਼ੀਆ ਅਤੇ ਭਾਰਤ ਦੇ ਪ੍ਰਮੁੱਖ ਕਲਾ ਮੰਚਾਂ ’ਤੇ ਪ੍ਰਦਰਸ਼ਿਤ ਹੋ ਚੁੱਕੀਆਂ ਹਨ। ਉਨ੍ਹਾਂ ਦੀਆਂ ਕਲਾਕ੍ਰਿਤਾਂ ਨਵੀਂ ਦਿੱਲੀ ਦੀ ਨੈਸ਼ਨਲ ਗੈਲਰੀ ਆਫ਼ ਮਾਡਰਨ ਆਰਟ ਅਤੇ ਅਮਰੀਕਾ ਦੇ ਪੀਬੌਡੀ ਐਸੈਕਸ ਮਿਊਜ਼ੀਅਮ ਦੇ ਸੰਗ੍ਰਹਿ ਦਾ ਵੀ ਹਿੱਸਾ ਹਨ।
ਇਸ ਤੋਂ ਇਲਾਵਾ ਪੰਜਾਬ ਅਤੇ ਟ੍ਰਾਈਸਿਟੀ ਦੇ ਉੱਘੇ ਕਲਾਕਾਰਾਂ ਗੁਰਮੀਤ ਗੋਲਡੀ, ਜਸਕੰਵਲ ਕੌਰ, ਸਾਧਨਾ ਸੰਘਰ, ਡਾ. ਬਲਦੇਵ ਗੰਭੀਰ, ਡਾ. ਜਸਪਾਲ ਅਤੇ ਡਾ. ਰਜਿੰਦਰ ਕੌਰ ਪਾਸਰੀਚਾ ਨੂੰ ਵੀ ਸਨਮਾਨਿਤ ਕੀਤਾ ਗਿਆ ਅਤੇ ਉਨ੍ਹਾਂ ਦੀਆਂ ਚੋਣਵੀਆਂ ਕਲਾਕ੍ਰਿਤਾਂ ਪ੍ਰਦਰਸ਼ਨੀ ਵਿੱਚ ਲਗਾਈਆਂ ਗਈਆਂ।
ਡਾ. ਜਸਪਾਲ ਨੇ ਕਲਾ ਸਿੱਖਿਆ ਅਤੇ ਸਟੂਡੀਓ ਅਭਿਆਸਾਂ ਨੂੰ ਅੱਗੇ ਵਧਾਉਣ ਵਿੱਚ ਅਹਿਮ ਯੋਗਦਾਨ ਪਾਇਆ ਹੈ। ਜਸਕੰਵਲ ਕੌਰ ਸਮਕਾਲੀ ਵਿਜ਼ੂਅਲ ਆਰਟ ਅਤੇ ਪੇਂਟਿੰਗ ਦੇ ਖੇਤਰ ਵਿੱਚ ਆਪਣੀ ਵੱਖਰੀ ਪਛਾਣ ਰੱਖਦੇ ਹਨ। ਸੀਨੀਅਰ ਕਲਾਕਾਰ ਸਾਧਨਾ ਸੰਘਰ ਦੀਆਂ ਕੁਦਰਤ ਅਤੇ ਵਾਤਾਵਰਨ ਆਧਾਰਿਤ ਰਚਨਾਵਾਂ ਨੂੰ ਰਾਸ਼ਟਰੀ ਅਤੇ ਕੌਮਾਂਤਰੀ ਪੱਧਰ ’ਤੇ ਸਰਾਹਿਆ ਗਿਆ ਹੈ। ਉਨ੍ਹਾਂ ਨੂੰ 2023 ਵਿੱਚ ਲਾਈਫਟਾਈਮ ਅਚੀਵਮੈਂਟ ਐਵਾਰਡ, 2014 ਵਿੱਚ ਦੈਨਿਕ ਭਾਸਕਰ ਪ੍ਰਾਈਡ ਐਵਾਰਡ ਅਤੇ 2012 ਵਿੱਚ ‘ਵੂਮੈਨ ਆਫ ਦਿ ਈਅਰ’ ਸਨਮਾਨ ਮਿਲਿਆ ਸੀ।
ਮੂਰਤੀਕਾਰ, ਚਿੱਤਰਕਾਰ ਅਤੇ ਕਲਾ ਅਧਿਆਪਕ ਗੁਰਮੀਤ ਗੋਲਡੀ ‘ਕਲਾਨਿਧੀ ਆਰਟ ਫਾਊਂਡੇਸ਼ਨ’ ਦੇ ਸਹਿ-ਸੰਸਥਾਪਕ ਹਨ। ਉਹ ਫਾਈਬਰਗਲਾਸ, ਧਾਤ, ਪੱਥਰ ਅਤੇ ਲੱਕੜ ਸਮੇਤ ਵੱਖ-ਵੱਖ ਮਾਧਿਅਮਾਂ ਰਾਹੀਂ ਆਪਣੀ ਕਲਾ ਪੇਸ਼ ਕਰਦੇ ਹਨ। ਉਨ੍ਹਾਂ ਦੀਆਂ ਰਚਨਾਵਾਂ ਵਿੱਚ ਕੁਦਰਤ, ਯਾਦਾਂ ਅਤੇ ਅਧਿਆਤਮਿਕਤਾ ਮੁੱਖ ਵਿਸ਼ੇ ਹਨ। ਡਾ. ਰਜਿੰਦਰ ਕੌਰ ਪਾਸਰੀਚਾ ਨੇ ਵਿਜ਼ੂਅਲ ਆਰਟ, ਕਲਾ ਸਿੱਖਿਆ ਅਤੇ ਖੋਜ ਦੇ ਖੇਤਰ ਵਿੱਚ ਯੋਗਦਾਨ ਪਾਇਆ ਹੈ।
ਮਰਹੂਮ ਡਾ. ਬਲਦੇਵ ਗੰਭੀਰ ਨੇ ਉੱਤਰੀ ਭਾਰਤ ਵਿੱਚ ਸਮਕਾਲੀ ਮੂਰਤੀਕਲਾ ਅਤੇ ਪਲਾਸਟਿਕ ਆਰਟਸ ਨੂੰ ਨਵੀਂ ਪਛਾਣ ਦੇਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। ਪੱਥਰ, ਧਾਤ ਅਤੇ ਮਿਕਸਡ ਮੀਡੀਆ ਵਿੱਚ ਉਨ੍ਹਾਂ ਦੀਆਂ ਰਚਨਾਵਾਂ ਨੇ ਕਲਾ ਜਗਤ ਵਿੱਚ ਆਪਣੀ ਵਿਲੱਖਣ ਛਾਪ ਛੱਡੀ। ਉਨ੍ਹਾਂ ਦੀ ਤਰਫੋਂ ਇਹ ਸਨਮਾਨ ਉਨ੍ਹਾਂ ਦੀ ਪਤਨੀ ਅਤੇ ਪੁੱਤਰ ਨੇ ਪ੍ਰਾਪਤ ਕੀਤਾ।




