Follow us

16/11/2026 5:31 AM

Search
Close this search box.
Home » News In Punjabi » ਮਨੋਰੰਜਨ » ਚੰਡੀਗੜ੍ਹ ‘ਚ 21 ਨਵੰਬਰ ਤੋਂ ਸਜੇਗਾ 10 ਰੋਜ਼ਾ ਕੌਮੀ ਨਾਟਕ ਮੇਲਾ, 10 ਸੂਬਿਆਂ ਦੇ ਕਲਾਕਾਰ ਦਿਖਾਉਣਗੇ ਕਲਾ ਦੇ ਜੌਹਰ

ਚੰਡੀਗੜ੍ਹ ‘ਚ 21 ਨਵੰਬਰ ਤੋਂ ਸਜੇਗਾ 10 ਰੋਜ਼ਾ ਕੌਮੀ ਨਾਟਕ ਮੇਲਾ, 10 ਸੂਬਿਆਂ ਦੇ ਕਲਾਕਾਰ ਦਿਖਾਉਣਗੇ ਕਲਾ ਦੇ ਜੌਹਰ

21ਵਾਂ ਟੀਐੱਫਟੀ ਵਿੰਟਰ ਨੈਸ਼ਨਲ ਥੀਏਟਰ ਫੈਸਟੀਵਲ 30 ਨਵੰਬਰ ਤੱਕ ਚੱਲੇਗਾ, 10 ਨਾਟਕਾਂ ਸਮੇਤ 45 ਦੇ ਕਰੀਬ ਗਤੀਵਿਧੀਆਂ ਹੋਣਗੀਆਂ, ਦਰਸ਼ਕਾਂ ਲਈ ਐਂਟਰੀ ਮੁਫ਼ਤ

21st TFT Winter Theatre Festival
Chandigarh: ਚੰਡੀਗੜ੍ਹ ਵਿੱਚ ਰੰਗਮੰਚ ਪ੍ਰੇਮੀਆਂ ਨੂੰ 21 ਨਵੰਬਰ ਤੋਂ 10 ਦਿਨਾਂ ਤੱਕ ਨਾਟਕਾਂ ਅਤੇ ਕਲਾ ਦੀਆਂ ਵੱਖ-ਵੱਖ ਵੰਨਗੀਆਂ ਦਾ ਆਨੰਦ ਲੈਣ ਦਾ ਮੌਕਾ ਮਿਲੇਗਾ। ਥੀਏਟਰ ਫਾਰ ਥੀਏਟਰ (ਟੀਐੱਫਟੀ) ਵੱਲੋਂ 21ਵਾਂ ਵਿੰਟਰ ਨੈਸ਼ਨਲ ਥੀਏਟਰ ਫੈਸਟੀਵਲ 21 ਤੋਂ 30 ਨਵੰਬਰ ਤੱਕ ਟੈਗੋਰ ਥੀਏਟਰ ਦੇ ਮਿੰਨੀ ਹਾਲ ਵਿੱਚ ਕਰਵਾਇਆ ਜਾਵੇਗਾ। ਇਸ ਵਿੱਚ ਦੇਸ਼ ਦੇ ਕਰੀਬ 10 ਸੂਬਿਆਂ ਤੋਂ ਆਏ ਨਾਟਕਕਾਰ ਅਤੇ ਕਲਾਕਾਰ ਆਪਣੀਆਂ ਪੇਸ਼ਕਾਰੀਆਂ ਦੇਣਗੇ। ਖ਼ਾਸ ਗੱਲ ਇਹ ਹੈ ਕਿ ਸਾਰੇ ਪ੍ਰੋਗਰਾਮਾਂ ਲਈ ਦਰਸ਼ਕਾਂ ਦੀ ਐਂਟਰੀ ਮੁਫ਼ਤ ਰਹੇਗੀ।

ਇਸ ਸਬੰਧੀ ਟੀਐੱਫਟੀ ਵੱਲੋਂ ਟੈਗੋਰ ਥੀਏਟਰ ਦੀ ਕੈਫੇਟੇਰੀਆ ਵਿੱਚ ਪ੍ਰੈੱਸ ਕਾਨਫਰੰਸ ਕੀਤੀ ਗਈ। ਇਸ ਮੌਕੇ ਸੰਸਥਾ ਦੇ ਪ੍ਰਧਾਨ ਅਨਿਲ ਵੋਹਰਾ, ਪੀਆਰ ਸਕੱਤਰ ਦਿਨੇਸ਼ ਸ਼ਰਮਾ, ਸਕੱਤਰ ਵਿਕਰਾਂਤ ਸੇਠ, ਫੈਸਟੀਵਲ ਡਾਇਰੈਕਟਰ ਹਰਵਿੰਦਰ ਸਿੰਘ ਅਤੇ ਉਦਘਾਟਨੀ ਨਾਟਕ ਦੇ ਨਿਰਦੇਸ਼ਕ ਸ਼ਰਦ ਸ਼ਰਮਾ ਮੌਜੂਦ ਸਨ।

ਅਨਿਲ ਵੋਹਰਾ ਨੇ ਦੱਸਿਆ ਕਿ ਇਹ ਮੇਲਾ ਕੇਂਦਰੀ ਸੱਭਿਆਚਾਰ ਮੰਤਰਾਲੇ, ਈਸਟਰਨ ਜ਼ੋਨਲ ਕਲਚਰਲ ਸੈਂਟਰ ਕੋਲਕਾਤਾ, ਨਾਰਥ ਈਸਟ ਜ਼ੋਨ ਕਲਚਰਲ ਸੈਂਟਰ ਨਾਗਾਲੈਂਡ, ਨਾਰਥ ਜ਼ੋਨ ਕਲਚਰਲ ਸੈਂਟਰ ਪਟਿਆਲਾ, ਹਰਿਆਣਾ ਕਲਾ ਪਰਿਸ਼ਦ ਅਤੇ ਚੰਡੀਗੜ੍ਹ ਸੰਗੀਤ ਨਾਟਕ ਅਕੈਡਮੀ ਦੇ ਸਹਿਯੋਗ ਨਾਲ ਕਰਵਾਇਆ ਜਾ ਰਿਹਾ ਹੈ।

ਸਕੱਤਰ ਵਿਕਰਾਂਤ ਸੇਠ ਨੇ ਦੱਸਿਆ ਕਿ ਇਸ ਵਾਰ ਮੇਲੇ ਦਾ ਵਿਸ਼ੇਸ਼ ਆਕਰਸ਼ਣ ‘ਪੂਰਵ ਰੰਗ’ ਹੋਵੇਗਾ, ਜਿਸ ਤਹਿਤ ਹਰ ਰੋਜ਼ ਸ਼ਾਮ 5 ਵਜੇ ਤੋਂ 6.30 ਵਜੇ ਤੱਕ ਵੱਖ-ਵੱਖ ਗਤੀਵਿਧੀਆਂ ਕਰਵਾਈਆਂ ਜਾਣਗੀਆਂ। ਸ਼ਾਮ 5 ਤੋਂ 6 ਵਜੇ ਤੱਕ ਕਲਾਕਾਰਾਂ ਨਾਲ ਰੂ-ਬ-ਰੂ ਗੱਲਬਾਤ ਹੋਵੇਗੀ, ਜਦਕਿ 6 ਵਜੇ ਕਲਾ ਪ੍ਰਦਰਸ਼ਨੀ ਦਰਸ਼ਕਾਂ ਲਈ ਖੋਲ੍ਹੀ ਜਾਵੇਗੀ। ਇਸ ਤੋਂ ਬਾਅਦ ਗਲੀ ਨਾਟਕ, ਕਵਿਤਾ ਪਾਠ, ਸਟੈਂਡਅੱਪ ਕਾਮੇਡੀ ਅਤੇ ਭੰਡ-ਮਿਰਾਸੀ ਦੀਆਂ ਪੇਸ਼ਕਾਰੀਆਂ ਹੋਣਗੀਆਂ। ਮੁੱਖ ਨਾਟਕ ਹਰ ਰੋਜ਼ ਸ਼ਾਮ 6.30 ਵਜੇ ਮਿੰਨੀ ਹਾਲ ਵਿੱਚ ਸ਼ੁਰੂ ਹੋਵੇਗਾ।

ਇਸ ਵਾਰ ਟ੍ਰਾਈਸਿਟੀ ਦੇ 9 ਨਾਟਕ ਗਰੁੱਪ ਗਲੀ ਨਾਟਕ ਪੇਸ਼ ਕਰਨਗੇ। ਸਮਾਪਤੀ ਵਾਲੇ ਦਿਨ ਸੰਗੀਤਾ ਗੁਪਤਾ ਦੀ ਅਗਵਾਈ ਹੇਠ ਲੜਕੀਆਂ ਦੀ ਟੀਮ ਵਿਸ਼ੇਸ਼ ਨਾਟਕੀ ਨ੍ਰਿਤ ਪੇਸ਼ਕਾਰੀ ਦੇਵੇਗੀ। ਇਸ ਤੋਂ ਇਲਾਵਾ ਗੁਰਨੀਤ ਕੌਰ ਵੱਲੋਂ ਦੋ ਰੋਜ਼ਾ ਮੈਕਰਮੇ ਹੈਂਡਲੂਮ ਕਲਾ ਵਰਕਸ਼ਾਪ ਵੀ ਕਰਵਾਈ ਜਾਵੇਗੀ।

ਫੈਸਟੀਵਲ ਡਾਇਰੈਕਟਰ ਹਰਵਿੰਦਰ ਸਿੰਘ ਨੇ ਦੱਸਿਆ ਕਿ ਅਸਾਮ, ਪੱਛਮੀ ਬੰਗਾਲ, ਬਿਹਾਰ, ਝਾਰਖੰਡ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਮੱਧ ਪ੍ਰਦੇਸ਼, ਪੰਜਾਬ ਅਤੇ ਚੰਡੀਗੜ੍ਹ ਸਮੇਤ ਵੱਖ-ਵੱਖ ਖੇਤਰਾਂ ਦੇ ਕਲਾਕਾਰ ਇਸ ਮੇਲੇ ਵਿੱਚ ਹਿੱਸਾ ਲੈਣਗੇ। ਮੇਲੇ ਦੇ ਬਾਹਰੀ ਵਿਹੜੇ ਨੂੰ ਵੀ ਵਿਸ਼ੇਸ਼ ਤੌਰ ‘ਤੇ ਸਜਾਇਆ ਜਾ ਰਿਹਾ ਹੈ। ਲੋਕਾਂ ਨੂੰ ਘਰਾਂ ਵਿੱਚ ਪਈਆਂ ਅਣਵਰਤੀਆਂ ਵਸਤਾਂ ਦਾਨ ਕਰਨ ਦੀ ਅਪੀਲ ਕੀਤੀ ਗਈ ਹੈ, ਜਿਨ੍ਹਾਂ ਦੀ ਵਰਤੋਂ ਸਜਾਵਟ ਲਈ ਕਰਕੇ ‘ਬੈਸਟ ਆਊਟ ਆਫ ਵੇਸਟ’ ਦਾ ਸੰਦੇਸ਼ ਦਿੱਤਾ ਜਾਵੇਗਾ।

ਇਹ ਹੋਣਗੇ 10 ਦਿਨਾਂ ਦੇ ਮੁੱਖ ਨਾਟਕ

21 ਨਵੰਬਰ ਨੂੰ ਉਜੈਨ ਦੀ ਅਭਿਨਵ ਰੰਗਮੰਡਲ ਵੱਲੋਂ ਸ਼ਰਦ ਸ਼ਰਮਾ ਦੇ ਨਿਰਦੇਸ਼ਨ ਹੇਠ ‘ਰਿਸਪੈਕਟਿਡ ਪ੍ਰਾਸਟੀਚਿਊਟ’ ਨਾਲ ਮੇਲੇ ਦੀ ਸ਼ੁਰੂਆਤ ਹੋਵੇਗੀ। 22 ਨਵੰਬਰ ਨੂੰ ਬਿਹਾਰ ਦੇ ਬੇਗੂਸਰਾਏ ਤੋਂ ਆਸ਼ੀਰਵਾਦ ਰੰਗਮੰਚ ਵੱਲੋਂ ‘ਪਸ਼ਮੀਨਾ’ ਪੇਸ਼ ਕੀਤਾ ਜਾਵੇਗਾ।

23 ਨਵੰਬਰ ਨੂੰ ਟੀਐੱਫਟੀ ਦੀ ਆਪਣੀ ਪੇਸ਼ਕਾਰੀ ‘ਅਜ਼ੀਅਤ’ ਹੋਵੇਗੀ, ਜੋ ਪ੍ਰਸਿੱਧ ਲੇਖਕ ਸਆਦਤ ਹਸਨ ਮੰਟੋ ਦੀਆਂ ਕਹਾਣੀਆਂ ‘ਤੇ ਆਧਾਰਿਤ ਹੈ। ਇਸ ਦਾ ਨਿਰਦੇਸ਼ਨ ਪ੍ਰੀਤ ਭੁੱਲਰ ਨੇ ਕੀਤਾ ਹੈ। 24 ਨਵੰਬਰ ਨੂੰ ਸ਼ਿਮਲਾ ਦੀ ਪਲੇਟਫਾਰਮ ਆਰਟ ਐਂਡ ਕਲਚਰ ਸੋਸਾਇਟੀ ਵੱਲੋਂ ਕਾਮੇਡੀ ਨਾਟਕ ‘ਡਬਲ ਟ੍ਰਬਲ’ ਪੇਸ਼ ਕੀਤਾ ਜਾਵੇਗਾ।

25 ਨਵੰਬਰ ਨੂੰ ਅਸਾਮ ਦੀ ਟੀਮ ‘ਕੌੜਾ ਸੱਚ’ ਅਤੇ 26 ਨਵੰਬਰ ਨੂੰ ਪੱਛਮੀ ਬੰਗਾਲ ਦੇ ਸੰਗੀਤ ਨਾਟਕ ਅਕੈਡਮੀ ਐਵਾਰਡੀ ਕਲਾਕਾਰ ਕੱਲੋਲ ਭੱਟਾਚਾਰੀਆ ਵੱਲੋਂ ‘ਰਾਧਾ ਕ੍ਰਿਸ਼ਨ’ ਸੰਗੀਤਕ ਅਤੇ ਨ੍ਰਿਤ ਪੇਸ਼ਕਾਰੀ ਕੀਤੀ ਜਾਵੇਗੀ, ਜਿਸ ਵਿੱਚ ਕਰੀਬ 25 ਕਲਾਕਾਰ ਹਿੱਸਾ ਲੈਣਗੇ।

27 ਨਵੰਬਰ ਨੂੰ ਬਠਿੰਡਾ ਦਾ ਨਾਟਕ ਗਰੁੱਪ ‘ਚਾਂਦਨੀ, ਚਾਂਦ ਔਰ ਚਕੋਰੀ’, 28 ਨਵੰਬਰ ਨੂੰ ਝਾਰਖੰਡ ਦੇ ਰਾਂਚੀ ਦੀ ਟੀਮ ‘ਮੇਰਾ ਕੁਝ ਸਮਾਨ’ ਅਤੇ 29 ਨਵੰਬਰ ਨੂੰ ਕਾਨਪੁਰ ਦਾ ਅਨੁਕ੍ਰਿਤੀ ਥੀਏਟਰ ਗਰੁੱਪ ‘ਸੱਚ ਕਹੇਂ ਤੋ’ ਪੇਸ਼ ਕਰੇਗਾ।

30 ਨਵੰਬਰ ਨੂੰ ਸਮਾਪਤੀ ਮੌਕੇ ਹਰਿਆਣਾ ਦੇ ਹਿਸਾਰ ਦੀ ਟੀਮ ਵੱਲੋਂ ਮੁਨੀਸ਼ ਜੋਸ਼ੀ ਦੇ ਨਿਰਦੇਸ਼ਨ ਹੇਠ ‘ਹਨੂਮਾਨ ਇਨਸਾਈਡ ਮੀ’ ਨਾਟਕ ਪੇਸ਼ ਕੀਤਾ ਜਾਵੇਗਾ। ਇਸ ਵਿੱਚ ਵੀ ਕਰੀਬ 25 ਕਲਾਕਾਰ ਹਿੱਸਾ ਲੈਣਗੇ।

ਹਰਵਿੰਦਰ ਸਿੰਘ ਨੇ ਕਿਹਾ ਕਿ ਇਸ ਵਾਰ ਨਾਟਕਾਂ ਦੀ ਚੋਣ ਕਰਦੇ ਸਮੇਂ ਕਾਮੇਡੀ, ਸਮਾਜਿਕ ਮੁੱਦਿਆਂ, ਸੰਗੀਤ, ਭਾਵਨਾਤਮਕ ਕਹਾਣੀਆਂ ਅਤੇ ਵਿਚਾਰ-ਉਤਸ਼ਾਹਿਤ ਕਰਨ ਵਾਲੇ ਵਿਸ਼ਿਆਂ ਨੂੰ ਤਰਜੀਹ ਦਿੱਤੀ ਗਈ ਹੈ। ਉਨ੍ਹਾਂ ਚੰਡੀਗੜ੍ਹ ਅਤੇ ਟ੍ਰਾਈਸਿਟੀ ਦੇ ਲੋਕਾਂ ਨੂੰ 21 ਤੋਂ 30 ਨਵੰਬਰ ਤੱਕ ਟੈਗੋਰ ਥੀਏਟਰ ਪਹੁੰਚ ਕੇ ਕਲਾਕਾਰਾਂ ਦਾ ਹੌਸਲਾ ਵਧਾਉਣ ਦੀ ਅਪੀਲ ਕੀਤੀ।

dawnpunjab
Author: dawnpunjab

Leave a Comment

RELATED LATEST NEWS