ਚੈੱਕ ਟੂਰਿਜ਼ਮ, ਬੁਡਵਾਰ ਤੇ ਵ੍ਰੇਡੇਸਟੀਨ ਬਣੇ ਭਾਈਵਾਲ; ਦੇਸ਼ ਭਰ ਦੀਆਂ ਮਹਿਲਾ ਗੋਲਫ਼ਰਾਂ ਦਿਖਾਉਣਗੀਆਂ ਹੁਨਰ
Punjab Open Ladies Amateur Golf Championship 2026 : ਚੰਡੀਗੜ੍ਹ ਗੋਲਫ਼ ਕਲੱਬ ਵੱਲੋਂ 32ਵੀਂ ਪੰਜਾਬ ਓਪਨ ਲੇਡੀਜ਼ ਐਮੇਚਿਓਰ ਗੋਲਫ਼ ਚੈਂਪੀਅਨਸ਼ਿਪ 2026 ਦੀ ਮੇਜ਼ਬਾਨੀ ਕੀਤੀ ਜਾ ਰਹੀ ਹੈ। ਸਾਲ 1966 ਵਿੱਚ ਸਥਾਪਿਤ ਇਸ ਵੱਕਾਰੀ ਕਲੱਬ ਦੇ ਚੈਂਪੀਅਨਸ਼ਿਪ ਕੋਰਸ ’ਤੇ ਹੋਣ ਵਾਲੇ ਤਿੰਨ ਰੋਜ਼ਾ ਮੁਕਾਬਲੇ ਵਿੱਚ ਦੇਸ਼ ਭਰ ਦੀਆਂ ਪ੍ਰਮੁੱਖ ਮਹਿਲਾ ਐਮੇਚਿਓਰ ਗੋਲਫ਼ਰਾਂ ਆਪਣੀ ਖੇਡ ਦਾ ਪ੍ਰਦਰਸ਼ਨ ਕਰਨਗੀਆਂ।
ਟੂਰਨਾਮੈਂਟ ਵਿੱਚ ਵ੍ਰੇਡੇਸਟੀਨ ਡੱਚ ਟਾਇਰਜ਼ ਮੁੱਖ ਸਪਾਂਸਰ ਵਜੋਂ ਜੁੜਿਆ ਹੈ, ਜਦਕਿ ਚੈੱਕ ਟੂਰਿਜ਼ਮ ਅਤੇ ਚੈੱਕ ਗਣਰਾਜ ਦੀ ਪ੍ਰਸਿੱਧ ਬਰੂਅਰੀ ਬੁਡੇਜੋਵਿਕੀ ਬੁਡਵਾਰ ਅਧਿਕਾਰਤ ਅੰਤਰਰਾਸ਼ਟਰੀ ਭਾਈਵਾਲ ਹਨ। ਇਸ ਮੌਕੇ ਬੁਡਵਾਰ ਦੇ ਐਕਸਪੋਰਟ ਡਾਇਰੈਕਟਰ ਇਵਾਨ ਸ਼ਵਾਰਜ਼, ਬ੍ਰਾਂਡ ਮੈਨੇਜਰ ਅਨੇਤਾ ਲੇਸ਼ਕੋਵਾ ਅਤੇ ਚੈੱਕ ਟੂਰਿਜ਼ਮ ਤੋਂ ਬਾਰਬਰਾ ਐਂਡੇਲੋਵਾ ਨੇ ਵੀ ਸ਼ਿਰਕਤ ਕੀਤੀ। ਭਾਰਤ ਵਿੱਚ ਬੁਡਵਾਰ ਦੇ ਰਾਸ਼ਟਰੀ ਵਿਤਰਕ ਐਗਵੇਜ਼ ਇੰਟਰਨੈਸ਼ਨਲ ਨੇ ਇਸ ਸਾਂਝੇਦਾਰੀ ਵਿੱਚ ਸਹਿਯੋਗ ਦਿੱਤਾ।
ਕਲੱਬ ਦੀ ਲੇਡੀ ਕੈਪਟਨ ਆਸ਼ੂ ਸਿੰਘ ਨੇ ਕਿਹਾ ਕਿ ਪੰਜਾਬ ਓਪਨ ਲੇਡੀਜ਼ ਐਮੇਚਿਓਰ ਗੋਲਫ਼ ਚੈਂਪੀਅਨਸ਼ਿਪ ਉੱਤਰੀ ਭਾਰਤ ਦੇ ਪ੍ਰਮੁੱਖ ਮਹਿਲਾ ਗੋਲਫ਼ ਟੂਰਨਾਮੈਂਟਾਂ ਵਿੱਚੋਂ ਇੱਕ ਹੈ। ਇਹ ਮੁਕਾਬਲਾ ਉੱਭਰਦੀਆਂ ਖਿਡਾਰਨਾਂ ਨੂੰ ਆਪਣੀ ਪ੍ਰਤਿਭਾ ਦਿਖਾਉਣ ਅਤੇ ਕੌਮੀ ਤੇ ਕੌਮਾਂਤਰੀ ਪੱਧਰ ’ਤੇ ਅੱਗੇ ਵਧਣ ਦਾ ਮੌਕਾ ਦਿੰਦਾ ਹੈ। ਉਨ੍ਹਾਂ ਦੇਸ਼ ਭਰ ਤੋਂ ਪਹੁੰਚਣ ਵਾਲੀਆਂ ਖਿਡਾਰਨਾਂ ਦਾ ਸਵਾਗਤ ਕਰਦਿਆਂ ਸਹਿਯੋਗੀ ਸੰਸਥਾਵਾਂ ਦਾ ਧੰਨਵਾਦ ਕੀਤਾ।
ਬੁਡਵਾਰ ਦੇ ਐਕਸਪੋਰਟ ਡਾਇਰੈਕਟਰ ਇਵਾਨ ਸ਼ਵਾਰਜ਼ ਨੇ ਕਿਹਾ ਕਿ ਭਾਰਤ ਦੀ ਇਹ ਉਨ੍ਹਾਂ ਦੀ ਪਹਿਲੀ ਫੇਰੀ ਹੈ ਅਤੇ ਵੱਕਾਰੀ ਗੋਲਫ਼ ਚੈਂਪੀਅਨਸ਼ਿਪ ਨਾਲ ਜੁੜਨਾ ਉਨ੍ਹਾਂ ਲਈ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਬੁਡਵਾਰ ਚੈੱਕ ਗਣਰਾਜ ਦੀਆਂ ਸਦੀਆਂ ਪੁਰਾਣੀਆਂ ਪਰੰਪਰਾਵਾਂ ਦਾ ਪ੍ਰਤੀਕ ਹੈ ਅਤੇ ਖੇਡਾਂ, ਸੈਰ-ਸਪਾਟੇ ਤੇ ਸੱਭਿਆਚਾਰਕ ਅਦਾਨ-ਪ੍ਰਦਾਨ ਰਾਹੀਂ ਦੋਵਾਂ ਦੇਸ਼ਾਂ ਦੇ ਸਬੰਧ ਮਜ਼ਬੂਤ ਕਰਨ ਦੀ ਉਮੀਦ ਰੱਖਦਾ ਹੈ।
ਬ੍ਰਾਂਡ ਮੈਨੇਜਰ ਅਨੇਤਾ ਲੇਸ਼ਕੋਵਾ ਨੇ ਬੁਡਵਾਰ ਨੂੰ ਚੈੱਕ ਗਣਰਾਜ ਦੀ ਸੱਭਿਆਚਾਰਕ ਵਿਰਾਸਤ ਦਾ ਅਹਿਮ ਹਿੱਸਾ ਦੱਸਦਿਆਂ ਚੈਂਪੀਅਨਸ਼ਿਪ ਨੂੰ ਸਮਰਥਨ ਦੇਣ ’ਤੇ ਖੁਸ਼ੀ ਪ੍ਰਗਟਾਈ। ਉਨ੍ਹਾਂ ਚੈੱਕ ਦੂਤਾਵਾਸ, ਆਨਰੇਰੀ ਕੌਂਸਲੇਟ ਅਤੇ ਮੇਜਰ ਆਰ.ਐਸ. (ਲਾਲੀ) ਵਿਰਕ ਦੇ ਸਹਿਯੋਗ ਦੀ ਵੀ ਸ਼ਲਾਘਾ ਕੀਤੀ।
ਕਲੱਬ ਦੇ ਪ੍ਰਧਾਨ ਮੇਜਰ ਆਰ.ਐਸ. (ਲਾਲੀ) ਵਿਰਕ ਨੇ ਕਿਹਾ ਕਿ ਇਹ ਚੈਂਪੀਅਨਸ਼ਿਪ ਖੇਤਰ ਵਿੱਚ ਮਹਿਲਾ ਗੋਲਫ਼ ਦੇ ਵਧਦੇ ਰੁਝਾਨ ਨੂੰ ਦਰਸਾਉਂਦੀ ਹੈ। ਉਨ੍ਹਾਂ ਕਿਹਾ ਕਿ ਅੰਤਰਰਾਸ਼ਟਰੀ ਭਾਈਵਾਲਾਂ ਨਾਲ ਸਾਂਝੇਦਾਰੀ ਖੇਡਾਂ, ਸੈਰ-ਸਪਾਟੇ ਅਤੇ ਸੱਭਿਆਚਾਰਕ ਸਬੰਧਾਂ ਲਈ ਨਵੇਂ ਮੌਕੇ ਖੋਲ੍ਹੇਗੀ।
ਮੁਕਾਬਲੇ ਵਿੱਚ ਸਖ਼ਤ ਸਟ੍ਰੋਕ-ਪਲੇ ਫਾਰਮੈਟ ਰਾਹੀਂ ਖਿਡਾਰਨਾਂ ਦੀ ਇਕਾਗਰਤਾ, ਸਹਿਣਸ਼ੀਲਤਾ ਅਤੇ ਰਣਨੀਤਕ ਸਮਰੱਥਾ ਦੀ ਪਰਖ ਹੋਵੇਗੀ। ਸੀਨੀਅਰ ਗੋਲਫ਼ਰਾਂ ਅਤੇ ਨੌਜਵਾਨ ਖਿਡਾਰਨਾਂ ਲਈ ਵੱਖ-ਵੱਖ ਸ਼੍ਰੇਣੀਆਂ ਵੀ ਹੋਣਗੀਆਂ। ਇਹ ਟੂਰਨਾਮੈਂਟ ਖਿਡਾਰਨਾਂ ਦੀ ਕੌਮੀ ਦਰਜਾਬੰਦੀ ਸੁਧਾਰਨ ਅਤੇ ਉਨ੍ਹਾਂ ਨੂੰ ਉੱਚ ਪੱਧਰੀ ਮੁਕਾਬਲੇ ਦਾ ਤਜਰਬਾ ਦੇਣ ਲਈ ਅਹਿਮ ਮੰਚ ਸਾਬਤ ਹੋਵੇਗਾ।
Mr.Ivan Schwarz Export Regional Director Budejovicky Budvar
Ms. Aneta Leskova Business Development Manager Budejovicky Budvar
